Ignacio Medina kazetariak hitzaldiaren aurkezpenean adierazi duenez, Yoshihiro Narisawa (Narisawa**, Tokio), bere sukaldaritzari darion sormena dela eta, Japonian sukaldaritza ulertzeko modua aldatu zuen chef hori da. Nipondarra bere seme Leorekin batera etorri da eta nahiago izan du inolako erregistrorekin ez lerrokatu ‘Epifaniaren atzetik. Irudimenari forma ematea’ izeneko hitzaldian: jasangarritasunak, ingurune naturalak eta urtaroek bere sorkuntzak nola baldintzatzen dituzten azaldu du.
"Narisawa Tokion dago eta japoniar kultura sukaldaritzaren bidez adierazten du, Japoniako produkturik onenak baliatuz.

Jasangarritasunarekin obsesionatuta gaude eta, horregatik, ekoizleak bisitatzen ditugu kalitate handiko frutak eta barazkiak bilatzeko, baina baita lurzoru seguruetatik datozenak bilatzeko ere", azaldu du chefak. "Hori dela eta, 2001ean lurra jatea erabaki genuen, eta nire lehen egile-platera lur zopa izan zen", gaineratu du.

Prozesu horrekin jarraituz, geroago, ingurune naturalari buruz pentsatu zuten eta basora joan ziren, eta basoetan eragindako kaltea ikusi zuten: "Pertsonak basotik urrundu egin gara. Zer egin dezaket nik natura babesteko? Japoniako basoak irudikatzen dituzten platerak, jendea horien garrantziaz ohar dadin”, erantzun zion bere buruari.

Baina Japoniaren % 70 itsasoz inguratuta dago eta, beraz, saihetsezina da naturarekin ezinbesteko kontaktuan dagoen eta espiritualki aberatsa den bizimodu bat izatea. Han bada termino bat, "satoyama", muinoen arteko espazio hori izendatzeko, mendien oina eta landatzeko moduko lautadak barne hartzen dituena, eta Narisawak bere egin duena, gastronomia jasangarriaz eta onuragarriaz aritzeko. 

Urtaroen garrantzia

Narisawan, "urtaroetan gertatzen diren aldaketak adierazten ditugu sukaldaritzaren bidez". Horrela, udaberriak loretan dauden gereziondoak ditu ezaugarri, plateretan fruta horrekin eta bere koloreekin islatzen direnak; uda, hezea eta beroa, Kyotokoa bezalako jaialdiekin, eta plater batzuk ekitaldi horien dekorazioan inspiratzen dira. Udazkena, uzta garaia da, eta "produktuen eskuzabaltasuna du ezaugarri". Negua, jai giroko garaia, errezeta bereziekin eta jolasekin ospatzen da, baina mendiak mantu zuri batez estaltzen badira ere, Narisawaren errezetek ñabardura horiek guztiak islatzen dituzte bere kolore eta testuretan.

Sukaldariak laugarren aldiz bisitatu du Gastronomika, eta "Udako oroimenak" izeneko plater berri bat aurkeztu du, ayu izeneko udako arrainean oinarritutakoa, zeina "ingurune naturala zaindu den lekuetan baino ezin da aurkitu. Basoa osasuntsu badago bakarrik aurki daiteke, ayua ibaiko goroldioarekin elikatzen delako". Bere errezetan, Japoniako sukaldaritzako osagai batzuk erabiltzen dira, arroza, soja edo gari sarrazenoa, besteak beste. Bertaratu direnek udako jaialdietan inspiratutako errezeta baten miniaturazko bertsioa probatu ahal izan dute.

Narisawak bere hitzaldia zera baieztatuz amaitu du, "eboluzionatzen duten platerak sortzen jarraituko dut, eta espero dut berriro ere agertoki honetan aurkezteko aukera izatea. Gastronomikari eta bere parte-hartzaile eta hizlari guztiei etorkizun oparoa opa diet".